IKA-LIMANG LINGGO SA KARANIWANG PANAHON, B
DALAWANG ASPEKTO NG PUSO NI
HESUS
Ipinapakita ng Mabuting Balita ngayon kung gaano
ka-abala ang Panginoong Hesus (Mk. 1:29-39). Una, pinagaling niya ang biyenang
babae ni San Pedro. Tila mabilis kumalat ang balita at lahat ng maysakit at
pinahihirapan ng masasamang espiritu ay dumating sa bahay noong gabing iyon.
Halos lahat ng tao ay nasa pintuan ng bahay ni San Pedro. At hindi nabigo ang
mga tao dahil sa sobrang atensyon na ibinigay ng Panginoong Hesus sa
kanila. Pinagaling ang maysakit, pinalaya
ang mga pinahihirapan ng masasamang espiritu.
Ito ang unang katangian ng puso ni Hesus – habag!
Awa! Malasakit! Ang kanyang habag
ay napakatindi. Hinihipo niya tayo kung saan tayo nasasaktan, kung saan tayo
naguguluhan, kung saan tayo pinahihirapan o inaalipin. Ang awa ng Panginoong
Hesus ay nagpapahilom, nagpapatahimik, nagpapabalik sa normal sa mga tao. Ang
puso niya ay puno ng malasakit sa nahihirapan sa puso, isip at katawan.
Subalit gaano man ka-abala ang Panginoong Hesus sa
pagtatalaga ng sarili niya sa mga tao, napansin ni San Marcos na “maaga pa
lamang bago ang bukang-liwayway” ang Panginoon ay bumangon na at naghanap ng
tahimik na lugar upang magdasal sa kanyang Ama sa langit.
Ito ang ikalawang aspekto ng puso ni Hesus –
pakikipagkaisa sa Diyos, panalangin at katahimikan! Ang kanyang pagiging malapit sa mga tao ay dito talaga
nanggagaling. Abala nga siya sa mga tao, pero hindi mawawaglit kailanman ang
panalangin at pagninilay. Babad siya sa paghihirap ng mga tao, pero lalo siyang
babad din sa panalangin. Habang
nagdarasal siya, lalo siyang lumalakas sa pagbabahagi ng buhay niya sa mga
nangangailangan ng tulong at atensyon niya.
Malaking pag-asa ito para sa atin. Napakalapit sa
atin ni Hesus kapag nakakaranas tayo ng pagdurusa. Alam niya ang ating
nararamdaman at nararanasan kapag tayo ay nasa gitna ng paghihirap. Subalit ang
ating pagkababad sa mga pagsubok natin ay isang paanyaya na lalong palalimin
ang ating pananampalataya sa Diyos. Imbitasyon ito upang lalong lumapit sa
Panginoon sa panalangin at pakikipag-uganayan na magbibigay kahulugan sa ating
mga karanasan. Sana ang dalawang
katangian ng Panginoong Hesus ay maging pundasyon din ng ating mga buhay
ngayon. Amen!
